Usapang ulam

Naisipan kong magsulat ng isang sanaysay sa ating sariling wika. Ilang taon na rin mula nang huli akong magsulat sa Tagalog. Sa totoo lang, nasa ikatlong pangungusap pa lang ako ay medyo napapahinto na ako upang isipin ang mag salita, “Ano na nga ba ito sa Tagalog?” Ngayon ko lang nakita na mas madali pala para sa akin na magsalita kaysa magsulat sa Tagalog. Malamang ay dahil kulang ako sa ensayo. Ngunit pipilitin ko pa ring magsulat, at kung talagang walang pag-asa, siguro naman pwede akong medyo mag-Taglish.

Isa sa mga bagay na nakakapagpasaya sa aming mag-asawa ay kung nakakapag-imbita kami ng aming mga kaibigan sa aming hapag-kainan. At dahil hindi karamihan ang mga kainan dito sa London upang madala namin ang mga kaibigan naming banyaga, sa bahay na kami naghahanda  upang matikman naman nila ang mga ulam natin sa Pilipinas.

Kapag kami ay maluwag sa oras o di kaya ay may espesyal na okasyon, talagang ume-effort kami. Iniisip namin kung paano namin maihahanda ang ulam na parang naihanda sa isang espesyal na kainan.

Kahapon ay inimbitahan namin ang dalawa naming kaibigan mula sa simbahan. Medyo maraming ginagawa sa trabaho ngunit dahil ang aming kaibigan na Ingles ay dadayo sa ibang bansa, naisipan naming maghanda bilang pagdiriwang sa biyaya. Tatlong taon rin siyang hindi uuwi rito sa Inglatera dahil sya ay isang opisyal ng embahada. Kasama niya ang isa pa naming kaibigan na mula naman sa Korea.

Ito ang aming mga handa. Ang una ay insalata (talong na ginisa sa mantikilya ng olibo, kamatis, mangga, tocinong manok, litsugas at ginisang bagoong sa gilid). Ang pangunahing ulam ay pansit palabok (pansit, lemon, hipon, dinikdik na chicharon, dahon ng sibuyas, coriander, itlog at pinalutong na tinapa). Para sa panghimagas, gumawa kami ng ginataang halo-halo na may saging, kamote at langka. Nilagyan rin namin ito ng sorbetes sa ibabaw. Nalusaw agad ang sorbetes pero masarap pala ito kapag hinalo sa ginataan. Sa gitna ng bawat handa at nagbigay kami ng atsara (gawa na mula sa bote) para panglinis ng ngala-ngala – sa Ingles, ‘to cleanse the palate‘.

Nagustuhan ng aming mga bisita ang lahat ng aming mga handa. Bukod sa mabilis nila itong nakain, malinis ang mga plato nila kaya andaling maghugas!  Ito ang ilan sa mga larawan:

Buwan ng wika ang Agosto, kaya sana pasado ang aking sanaysay. Tulad ng ano mang bagay, mabuti na ang mag-ensayo paminsan-minsan upang di makalimutan. Hanggang sa muli…